Алтындай ҡиммәт иген

Районда ураҡ эштәре дауам итә.  Ауыл хужалығы эшсәндәре аяҙ көндәрҙе файҙаланып ҡалырға тырыша.  “Инйәр”     яуап­лылығы сикләнгән йәмғиәтенә ҡараған баҫыуҙарҙа ла техника гөрләй. Хужалыҡ тарафынан 502 гектар майҙанда ужым арышы (178 гектар), һоло (154 гектар) һәм яҙғы бойҙай (170 гектар) сәселгән. 
29 июлгә ҡарата планға ярашлы дөйөм майҙандың 20,9 проценты сабылған. Әлеге мәлдә 105 гектарҙа ужым арышы һуғылған, бөтәһе 160 тонна ашлыҡ йыйып алынған, бер гектарҙан уртаса 15 центнер иген тупланған.
А.Рәхимов.
Хужалыҡ етәксеһе Мөнир Рәхмәтуллин Анатолий Швейкин менән.
 
2016-07-29 15:49:21 

Һөҙөмтәләр яҡшы

2016 йылдың 28 июлендә Өфө ҡалаһында Рәсәй яза башҡарыу федераль хеҙмәтенең Башҡортостан Республикаһы буйынса идаралығы коллегияһының киңәйтелгән ултырышы уҙҙы.
Унда идаралыҡтың ағымдағы йылдың тәүге ярты йыллыҡ эшмәкәрлегенә йомғаҡ яһалды һәм икенсе ярты йыллыҡҡа бурыстар ҡаралды.
Йылдың тәүге алты айына йомғаҡ яһағандан һуң,  республика филиалдары  араһында яҡшы хеҙмәт һөҙөмтәләренә өлгәшкән Рәсәй яза башҡарыу федераль хеҙмәтенең БР буйынса идаралығындағы енәйәти-башҡарыу инспекцияһы Архангел районындағы ҡаҙна учреждениеһына беренсе урын бирелде һәм Маҡтау ҡағыҙы тапшырылды.
Хәлит Кәримов,
Архангел районындағы енәйәти-башҡарыу 
инспекцияһы филиалы начальнигы.
 
2016-07-29 15:44:40 

Еңеүгә бер аҙым

Районда халыҡтың сәләмәт тормош рәүешен алып барыу, дөйөм спортты үҫтереү йәһәтенән байтаҡ эштәр башҡарыла. Мәҫәлән, хоккей төрөн генә алғанда ла, һуңғы йылдарҙа төбәк-ара ярыштарҙа спортсыларыбыҙ еңеүҙәр яулай. Әлбиттә, уңыштарға өлгәшеү өсөн теләк булыуы ғына аҙ, бының өсөн махсус шарттар, уңайлыҡтар ҙа кәрәк. 
Ошо көндәрҙә Ҡыҙыл Еҙем ауылы мәктәбе территорияһындағы хоккей ҡабында ремонт эштәре башҡарылды. Юл төҙөү һәм төҙөкләндереү идаралығы тарафынан майҙансыҡта асфальт ҡатламы түшәлһә, буяу һәм төҙөкләндереү эштәрен ауыл хакимиәте белгестәре атҡарҙы.
Альберт Рәхимов.
 
2016-07-29 15:39:23 


100 проценттан ашыу…

27 июлгә ҡарата районда 8300 гектар майҙанда үлән сабылған. Барыһы 5050 тонна (71 процент) сенаж, 11720 тонна (102 процент) бесән тупланған. Бөтәһе 68150 центнер мал аҙығы әҙерләнгән, был бер баш малға 24 центнер аҙыҡ берәмеге тура килә тигән һүҙ.
А.Әхмәтов.
 
2016-07-29 15:34:36 

Сыныҡтырҙы ел-дауылдар

Абҙан ауылында тыл һәм хеҙмәт ветерандары әле лә бирешмәҫкә тырышып донъя көтә, үҙҙәренең яҡындарына баштарынан кисергәндәрҙе  түкмәй-сәсмәй еткереп, һәр береһенә именлек,тыныс тормош теләй. Шундайҙарҙың береһе— Мәрзиә Ҡускилдина. 
Уларҙың үткәндәре  ҡәҙерле  ҡомартҡылай,  хәтер һандығы асылыу менән барыһы ла бөгөнгөләй күҙ алдына баҫа һәм бәйән ителә.
Мәрзиә Хисаметдин ҡыҙы Наил Мөхәмәтдин улы менән 55 йыл тигеҙ ғүмер кисереп, биш бала тәрбиәләп үҫтерә.  Ҡыҙы Гөлсәнә 36 йәшендә генә вафат булып, ике  балаһы, (Айгөл һәм Әлфиәһе) етем ҡала. Уларҙы ла аяҡҡа баҫтырыу өсөн дә көстәрен йәлләмәйҙәр. Бөгөн инде  ғәзиздәренең барыһы ла  илебеҙҙең төрлө яҡтарында  башлы-күҙле булып, үҙ аллы йәшәй, әсәй-өләсәйҙәренә ярҙамлашып китә. 
—1941 йылда  миңә  13 йәш ине, кохозда эшләй башланым. Белемем —7 класс. Инәйем ауырыу, өйҙә ишле бала. Күргән ҡыйынлыҡтарҙы һөйләп бөтөрлөк түгел. Ҡышын урман киҫәбеҙ, яҙын, сәсеү ваҡыты етһә, Ҡарламандан орлоҡ ташыйбыҙ.  Бер килке яңы трактор килде. Яғыулығы утын менән булғанға, ағасты ваҡлап турап,  дүрт-биш тоҡ әҙерләп ҡуябыҙ. Үгеҙ егеп, ер ҙә тырматтыҡ. Күмәк ҡыҙҙар менән күрмәгәнде күрҙек, ҡыҙғанысҡа ҡаршы, уларҙың барыһы ла гүр эйәһе. Көс еткеһеҙ эштәрҙә сынығып, түҙемлекте усҡа йыйып, фронт өсөн, еңеүебеҙ өсөн ҡара тир түктек. 1948 йылда вербовкалау башланды. Черниковкала пилорама ярҙамсыһы  итеп тәғәйенләнеләр. Таҡта ярабыҙ, пленға алынған әсирҙәр —немец һалдаттары  машинаға тейәй. Аҙаҡ өс йылдан ашыу тимер юлында бил бөктөм. 1955 йылда Наилды осратып, тормошҡа сыҡтым. Ауылға ҡайтып төпләндек. Иптәшем ташсы ине, гел төҙөлөштә ҡайнаны. Үҙем сөгөлдөр эшкәрттем. Донъялар иркенәйеп, еңеллек килгәс, 14 йыл дауамында  баҡсасылыҡ шөғөлләндек. Йәшелсә үҫтереп, һатып, арыу ғына килем дә ала торғайныҡ. Өлгөрмәгән саҡтарҙа утауға ауыл кешеләре ярҙамға килде,— тип үткән ваҡиғаларҙы иҫенә төшөрҙө Мәрзиә инәй.
Тыл һәм хеҙмәт ветераны Еңеү көнө алдынан Рәсәй Президенты һәм Республика Башлығынан Ҡотлау хаттары алып һөйөнә, юбилей миҙалдарын һаҡлай. Ә инде шулар араһындағы  иң-иң ҡәҙерлеһе — һуғыш йылдарындағы эшенең баһаһын дәлилләүсе  “Оҙайлы намыҫлы хеҙмәте өсөн”  һәм  “1941-1945 йылдарҙағы фиҙаҡәр хеҙмәте өсөн”  миҙалдары.
 Миләүшә Бәширова.
 
2016-07-28 16:32:02 


Организмдағы "һалдаттар"

Кеше организмында бактерияларҙы йотоусы күҙәнәктәр йәғни фагоциттар "һалдаттар" кеүек, һәр саҡ һаҡта. Тимәк, улар мөһим функция үтәй. Фагоциттар лейкоциттарға (ҡандың аҡ күҙәнәктәренә) ҡарай, сөнки эритроциттарҙан (ҡандың ҡыҙыл күҙәнәктәренән) айырмалы рәүештә, улар аҡ төҫтә. Әгәр тәндең берәй еренә ауырыу тыуҙырыусы микроб йәки сит-ят есем үтеп инһә, фагоциттар шунда уҡ көрәш башлай, был ерҙе ҡамап алып эшкәртә, иҫкеләре урынына яңынан-яңы фагоциттар үтеп инеп кенә тора. Был микробты тамам еңгәнгә тиклем дауам итә.

Әгәр ҡулға йәки аяҡҡа кергән шырауҙы тартып алһаҡ ошо урын шешеп, эренләп тора. Сөнки микробтар тарҡалғанда ағыулы матдәләр-токсиндар бүлеп сығара. Бер аҙҙан шеш ҡайта, уның урынында яңы тире барлыҡҡа килә.

Кеше ауырығанда, инфекция көслө булғанда, ҡанда лейкоциттарҙың күләме икеләтә артып китә. Уларҙың кимәле — хәл торошто күрһәтә. Бына ни өсөн ниндәй ҙә булһа ауырыуҙы асыҡлағанда анализ биреү, тикшереү үтеү мөһим сара икән.

Альбина Мырҙағолова, табип-лаборант.

2016-07-28 16:26:55 


Страница 1 из 241